Мала анализа...

Ќе се обидам во малку пократок текст да разјаснам некои работи околу целата ситуација во Италија.

Обвинението: Прво и основно е дека се работи за повеќе обвиненија врз различни структури и поединци во Италија. Значи не е целата ситуација во врска со Јувентус (ако досега тоа не ви беше јасно). Посебни истражни постапки се покренати во Рим, Торино, Милано, Фиренца и Неапол кои за цел имаат разоткривање и казнување на “матните“ работи.

Поради прислушкувани телефонски разговори, се товарат Моџи и Џиурадо (Јувентус), Меани (Милан), браќата Дела Вале (Фиорентина) и неколку директори на Лацио и Удинезе за притисоци врз судиите т.е. соработка со високите судиски кругови во Италија за влијание врз назначувањето на судии за одредени натпревари. Мора да се потенцира дека овие клубови (Јуве, Фиорентина, Лацио, Милан..) не победуваат на сите натпревари кои се под истрага и затоа истрагата оди во правец кој води накај кладилниците. Едното можно обвинение кое ќе произлезе од овие истраги е дека неколкумината директори лично за своја корист влијаеле на исходи од натпревари за свој личен профит во кладилниците. Доколку обвинението тргне во тој правец, тогаш е многу веројатно дека сите клубови ќе се спасат од било какви обвиненија и казни бидејќи сопствениците ќе се бранат по принципот “Ние ништо не знаевме, да знаевме немаше да дозволиме...“.
Другиот можен правец е дека ќе се покрене обвинение против самите клубови дека преку своите директори влијаеле на исходот од натпреварите со цел подобар пласман на самиот клуб. Тука веќе наебуваат клубовите. Доколку ова биде докажано, сите клубови ќе лапнат казни во зависност од бројот на натпреварите кои ги “наместиле“... Така, некој ќе биде казнет парично, некој со одземање бодови, а некој (Јуве:() можеби дури и со префрлање во понизок ранг на натпреварување.

Тоа е тоа што се однесува до целата истрага. Како нова информација е тоа дека и претседателот Интер се вмешува во целата ситуација откако беа објавени снимени телефонски разговори поврзани со делегирањето судии за натпревари од Лигата на шампионите, но тоа е сеуште во почетна фаза.

Многумина од вас во коментарите ја поврзаа целата ситуација со казнувањето на Џенова поради еден наместен натпревар. Разликата е во тоа што тука има сеуште недокажани обвиненија и не се работи за “купување“ на натпревари. Во случајот на Џенова, претседателот (и сопственик) на клубот беше фатен со куфер полн пари во кеш кој му го предаваше на официјален претставник на другиот клуб (не ми текнува кој беше).

Како и да е, едно е сигурно - се ќе биде готово до крајот на јули. Што и да филозофираме ние тука, на крајот судовите во Италија ќе бидат тие кои ќе го имаат последниот збор. Јас лично се надевам дека Јуве ќе куртули од испаѓање од Серија А. Навистина сум разочаран што мојот омилен клуб за кој навивам откако знам за фудбалот е вмешан во вакво нешто и искрено сакам да се казнат сите оние кои се одговорни за тоа што се случува (било да е тоа Моџи или пак некој од фамилијата Ањели сеедно...). Сакам Јуве конечно да биде исчистен од лошите луѓе дури и по цена на испаѓање во Серија Б, Ц...